Luke 7

Jisas Ndi, Rom El Nde Wu Kuimbal Ei Nga Kongun Wu Ei Etpa Titim

1Jisas ni, wamp ik mbo endpa pora ndupa, wote Kaperniyum kona peng ila purum. 2Kona peng ila Rom el nde wu kuimbal ti, el wu 100 nokᵾndrᵾm. Ei nga, kongun wu ti, numan minal ngurum ni, kui ropa koⱡmba itim. 3El nde wu kuimbal ni, moⱡpa pitim mel, Jisas ni, onum nᵾtᵾng. Ni kᵾn, Jisas ndi, elim kongun wu ei etpa tangga nimba, Jura wu nuim kat, Jisas kᵾn pᵾi nimba tᵾpa mundrum. 4Wote, wu ni kᵾⱡ, rᵾng puk, Jisas murum kona nila, ronduⱡ mundᵾk, Jisas kᵾn kont kaimp ik ranggᵾk, nᵾk mel, “Wu kai ti nga elim nga kongun wu koⱡmba enim ei, nim ndi okᵾn, wu ei tᵾk rᵾpᵾndᵾn nimbun onmᵾn. 5Ei nambuⱡ emel, wu ei ndi, tᵾn Jura wamp mbᵾ, numan ngumba, tᵾn nga atinga manga kel ei, rakᵾndpa itim,” nᵾtᵾng.

6Wote Jisas ni, wu ni kᵾⱡ kᵾn, rᵾp rok yant ok, manga keta kona nila, nondpa oⱡina kᵾn, el nde wu kuimbal ni ndi, wu kat tᵾpa munduⱡnga puk, Jisas kundᵾk nᵾk mel, “Wu Nuim ye! Nim numan ti, pili nᵾpili! Na wu kai ti mon! Ei nga, manga ila mukᵾr uin mel mon! 7Wote, na wu kai ti mon ei nga, Jisas omp kᵾnimp mel mon ku. Jisas ruⱡ etpa moⱡpa, ik ei nangga kᵾn, nangga kongun wu ei nga kui ei, kapⱡa itangga! 8Na nᵾnt wu ei, na nga wu nuim ei ndi, kongun mat ngurum ei kᵾn, wu nuim ei nga mana orunga moⱡᵾp endᵾt. Wote, na nga el wu mbᵾ, na nga mana orunga mormᵾn. Na ndi, wu ti kundᵾp, ‘nim pi,’ nᵾt ndam, wu ei purum ku. Wote wu ti, ‘yant wangga,’ nᵾt ndam, wu ei yant orum ku. Kongun wu ei kundᵾp, ‘kongun tangga’, nᵾt ei kᵾn, kongun etᵾm ku,” nitim.

9Wote Jisas ndi, el nde wu kuimbal ni nga, ik nitim ni pilpa, ᵾⱡi ropa, tᵾpa peling ndupa, wamp rᵾⱡaip mam ti, elim pep rok orung nimbᵾ, kundpa nimba mel, “Isrel kona ila wamp ti, mondpa pili uⱡ ei nga, na kᵾni nakᵾndᵾr mel, wu ei ndi, ninim kant!” nitim. 10El nde wu kuimbal ei ndi, tᵾpa mundrum wu ni kᵾⱡ, kelik mang kona int puk, kongun wu kui rurum ni, kandrᵾng mel kui ni, kapⱡa elinga, wei murum.

Jisas Ndi, Amp Wiya Ti Nga Kangᵾm Kurum Ni, Etpa Kont Titim

11Wote, ui ti kᵾn nondpa ku, Jisas elim nga kitip kᵾni wu kᵾⱡ kᵾn, wamp rᵾⱡaip mam ti kunda, Nein kona peng ila, ping pilik purung. 12Jisas ni mba, kona peng ei nga paⱡa keta puⱡ puⱡ ila nondpa puⱡnga, wu kurum ti nga on ei, ting pilik, rupⱡaima kulk, mek ekit orung. Kang wu kurum ei, amp wiya ei nga kang tenda mitim ei. Kona peng ila wamp puⱡi, amp ei kᵾn, koⱡa manga molk kunda rᵾp rok orung.

13Wote Jisas ndi, amp wiya ni, ka etpa urum ni, kandpa kont ndi, koⱡpa amp ni, kundpa nimba mel, “Nim ka iti nᵾti!” nitim. 14Jisas ndi, kang wu on rupⱡaima kulk, mek orung nila, nondpa mba anggilpa, ki oⱡa ndupa, nimba mel, “Kang wu kumᵾndᵾp ye! Nim kundᵾp nᵾnt rut nᵾkᵾn oⱡa muⱡi!” nitim. 15Kang wu kurum ni, rut nimba, oⱡa moⱡpa, ik mat puⱡ mondpa nitim. Wote Jisas ndi, kang wu ni, tᵾpa mam ngurum. 16Uⱡ itim ni, wamp mbᵾ kandᵾk, min ngᵾn mundᵾk, Got nga mbi paka rondᵾk, nᵾk mel, “Painui wu ou ti, tᵾn kᵾn om. Wote, Got ni omba, elim nga wamp mbᵾ, tᵾpa rapᵾndᵾmba, pilpa om,” nᵾtᵾng. 17Wamp nimbᵾ ndi, int puk, Jura kona peng na, wote kona mbila elpa elpa puk, Jisas nga itim uⱡ kᵾⱡ, timan rok nᵾk, mek purung.

Wamp Nu Tindi Wu Jon Ndi, Elim Nga Kitip Kᵾni Wu Raⱡ Tᵾpa Jisas Kᵾn Mundrum.

18Wamp nu tindi wu Jon nga kitip kᵾni wu kᵾⱡ ndi, Jisas nga uⱡ itim kᵾⱡ kandᵾk ok, Jon elim kundᵾk nᵾtᵾng. Wote Jon ndi, elim nga kitip kᵾni wu raⱡ tᵾpa kᵾn pukᵾⱡ, Jisas waldkᵾⱡ ni kᵾⱡ mel. “Nim wu ei, Jon ndi, wu ti akil tepa omba nokundmᵾn nitim wu ni, muna tᵾn wu elpa ti, omba nga nokundmin nda?” nitim. 20Wote, wu ni raⱡ, Jisas murum kona nila rᵾk pukᵾⱡ, nᵾkᵾⱡ mel, “Wamp nu tindi wu Jon ndi, tᵾl tᵾpa mundpa, nimba mel, ‘Nim Got ndi, tᵾpa mundᵾmba nimba, Jon ndi, nitim wu ei muna tᵾn wu elpa ti nokundmin nda?’” nᵾtᵾnggil. 21Ui ei kᵾn, Jisas ndi, wamp kui elpa elpa rurum mbᵾ, etpa tᵾpa, wote kur kit rukᵾr murum wamp mbᵾ, nimba tᵾpa mundpa, wote mong ti wamp mbᵾ nilinga, kona kandrᵾng. 22Wote Jisas ndi, wu raⱡ nga ik ni, punt ropa nimba mel, “Akup enmbil kᵾⱡ, enmbil kandkᵾⱡ pilkᵾⱡ kᵾⱡ, enmbil uⱡ kᵾⱡ mel pukᵾⱡ, Jon kundkᵾⱡ nᵾl! Mong ti wamp mbᵾ, kona kanmin, kᵾmp elkᵾna rumbᵾⱡi wamp mbᵾ, nombuⱡa mam andinmin, kint pombuⱡma wamp mbᵾ nga kᵾng mbᵾ, eng nonum, kum ngurum wamp mbᵾ, ik pᵾnmin wamp korung mbᵾ, etpa kont tᵾnᵾm. Wamp kurpa mbᵾ kᵾn, Rᵾnang Ik Kai mbᵾ, kundpa ninim. 23Wamp ti, na kᵾn mondpa pᵾtᵾm uⱡ ei, wak rui narᵾm ndam, kai pilangga!” nitim.

24Wote, Jon nga wu ni raⱡ puⱡᵾnggila kᵾn, Jisas ndi, Jon nga ik mat, wamp minal morung ila kundpa, nimba mel, “Enim ndi, Jon kona kui waka ila kᵾning purung ei kᵾn, namba mel ti, kᵾnmin nᵾk pᵾtᵾng? Enim ᵾi ongum na mel ti, kᵾpkᵾ ropa roka nitim ila, kᵾning purung ei? 25Enim namba mel ti, kᵾning pilik purung? Wu ti, mᵾkᵾ etpa murum ila kᵾning pilik purung ei? Mᵾkᵾ etmin wamp mbᵾ, rapa keta ila mint molk etmin. 26Enim namba mel ti, kᵾning pilik purung ei, na kundᵾk nᵾiya? Enim painui wu ti, kᵾning purung. Ei kupa painui wu ei ndi, painui wu ei ndi, wu mat tᵾpa mana ndurum. 27Buk Wingti ila Got ndi, Jon nga nᵾndpa mel,

‘Na nga nombuⱡa rung wu ti, kuimp tᵾp mundamba kᵾn omba, Got nga omba wu ei nga nombuⱡa mam ei, tᵾpa kun etpa rondpa moⱡmba!’ nᵾtᵾm.
28Na ndi, enim kundᵾp nᵾnt. Ya mana mᵾi kona ila morung, wu mbᵾ pora, Jon ndi, tᵾpa mana ndurum. Wote, akup wamp nam ti ndi, Got nga tᵾpa mumuk rui uⱡ ei, wamp mbi mul nᵾmbil wamp mel raⱡpa moⱡum ndam, Jon tᵾpa mana ndumba,” nitim. 29Wote, ku takis tᵾtmᵾn wu mbᵾ kᵾn, wamp na morung nimbᵾ ndi, Jon nga ik nitim nimbᵾ pilik, Got nga uⱡ mbᵾ, kapⱡa itmin nilingina, Jon ndi, wamp mbᵾ nu tinditim. 30Wote, Perisi wu na, mi ik mbo wu mbᵾ ndi, Jon nga nitim ik nimbun pilik tᵾk mbᵾⱡ ngᵾk, Got nga uⱡ mbᵾ, iti nᵾtmin nilingina, Jon ndi, wu mbᵾ nu tindi nᵾndᵾtᵾm.

31Wote Jisas ndi, ik nimba mel, “Akup ya ila mormin wamp mbᵾ nga enmin uⱡ kᵾⱡ, nᵾmp mot nduimp uⱡ ei, namba ik ek ti, rop namba kᵾn, wamp mbᵾ pilik ting nda? 32Wamp mbᵾ, kangambuⱡa kel na mat, rᵾng rarᵾp rarmin kona mbila molk, kangambuⱡa mat ndi, mat wi rok nᵾtmin ei mel, ‘Tᵾn kowa pela ik ndᵾmᵾn ei kᵾn, enim kinan ni nanᵾng. Wote, kont kaimp kinan nimin ei kᵾn, wote enim ka iti natᵾnmin ku!’ nᵾtᵾng. 33Wamp nu tindi wu Jon urum ei ndi, rung mowi pepa, nu wain nui nandpa itim uⱡ ei, wote enim ndi, wu ei, kundᵾk nimba mel, ‘Kur kit rukᵾr orunga morum,’ nᵾtᵾng. 34Akup Muⱡᵾl Wu Kupa ei omba, nu na, rᵾng na mbᵾ nonum ei, enim ndi, wu ei kundᵾk, ‘Wu ei rᵾng wal nomba, nu ming nduka nomba, enim ninmin. Wote, ku takis tᵾk, uⱡ kit etmin wamp kᵾⱡ kᵾn, rᵾp ronum ei ka!’ ninmin. 35Wote, Got nga pilpa kungᵾndi pilik tᵾtmᵾn wamp mbᵾ ndi, uⱡ mat etᵾk, tᵾn ora ndurmin, pilpa kungᵾndi ei, kupa mint,” nitim.

Amp Wapra Ti Ndi, Jisas Nga Kᵾmp Raⱡ Kopung Kᵾndrᵾm

36Wote, Perisi wu ti ndi, Jisas ni, elim nga manga ila, rᵾng nangga wangga nitim. Wote Jisas ni, Perisi wu ni nga manga ila mba, rᵾng nomba murum. 37Ni kᵾn, amp wapra ti, kona peng ila rᵾk murum. Amp ni, moⱡpa pitim mel, Jisas ni omba, Perisi wu ti nga manga ila rᵾng nomba morum nᵾtᵾng. Ik ni pilpa kᵾn, kopung ming ronduⱡ mura rui ti tᵾpa mepa, Jisas murum manga nila purum. 38Amp ni mba, Jisas murum kᵾmp puⱡ ila nondpa moⱡpa, ka etpa murum. Ni kᵾn, ka nu mana omba, Jisas nga kᵾmp puⱡ ila urum mbᵾ, amp ei ndi, elim nga peng ndi kᵾⱡ ndi, kil ngurum. Wote, Jisas nga kᵾmp ni, keta nu ropa nomba, kopung ni tᵾpa, kopung kandpa itim. 39Wote, Perisi wu ni, moⱡpa kᵾndrᵾm mel, amp wapra ni ndi, itim uⱡ ni kandpa, numan ou ndupa pilpa, nimba mel, “Wu ei, kupa painui wu ti ndam, amp ei ndi, elim ambuⱡpa enim ei kᵾn, amp ei nga uⱡ kit etᵾm mbᵾ, pilpa mbi ndumba. Amp ei, uⱡ kit mbᵾ etᵾm ndi, ka nimba pitim,” nitim. 40Wote Jisas ndi, Perisi wu ni nga numan pilpa murum ni kᵾⱡ, kandpa pora ndupa, nimba mel, “Saimon, na ndi, ik ti nim kundᵾp namp,” nitim. Wote Saimon ndi, Jisas kundpa, nimba mel, “Ik mbo wu ye! Nim ni!” nitim. 41Wote Jisas ndi, kundpa nimba mel, “Wu raⱡ ndi, wu ti nga ku moni kat punt mondkᵾⱡ tᵾtᵾnggil. Wu ti, ku moni K500 titim. Wu ti, ku moni K50 mint titim. 42Wu raⱡ, ku moni punt mondkᵾⱡ tᵾtᵾnggil kᵾⱡ, punt rokᵾⱡ nguinggil mel, kapⱡa mon itim ila, ku moni puⱡ wu ei ndi, ku punt kᵾⱡ, wak rurum. Akup nim pᵾn ei, wu raⱡ nga, wu nam ndi, ku moni puⱡ wu ei, numan minal ngurum nᵾkᵾn pᵾn?” nitim. 43Wote Saimon ndi, punt ropa nimba mel, “Ku moni ou ndupa, punt mundrum wu ei, nim pᵾnt!” nitim. Wote Jisas ndi, Saimon kundpa nimba mel, “Nim numan kun pilkᵾn nin,” nitim. 44Ni kᵾn, Jisas ndi, tᵾpa ropᵾl ropa, amp ni, kandpa kᵾn, Saimon kundpa, nimba mel, “Nim ndi, ya amp ei kan ei? Na ya, nim nga manga ila mukᵾr unt ei kᵾn, nim ndi, na nga kᵾmp ⱡumᵾi ruimp nᵾkᵾn, nu kulkᵾn mundi nᵾmᵾndᵾn ni ka! Wote, amp ei ndi, elim nga ka em nu ei ndi, na nga kᵾmp ⱡumᵾi rondpa, elim nga peng ndi kᵾⱡ ndi, kil ngumba enim ni ka! 45Na kor mel mukᵾr omp mont ni, wote nim ndi, na keta nu rok nui nᵾnᵾn. Wote, amp ei ndi, na nga kᵾmp raⱡ, keta nu ropa nomba enim. 46Nim ndi, kopung mat tᵾkᵾn, na nga peng ila kep, kopung kundi nᵾkᵾndᵾn, ni ka! Wote, amp ei ndi, kopung mura rui kai ti mepa omba, na nga kᵾmp raⱡ, kopung kandpa enim. 47Uⱡ ei nga, na ndi, nim kundᵾp nᵾnt. Ya amp ei ndi, na numan minal ngunum. Uⱡ ei ndi, ora ndupa, amp ei nga uⱡ kit minal etᵾm mbᵾ, Got ndi, wak rondnum. Wote, wamp nam ti, uⱡ kit mel wei kᵾralt etᵾm ei, Got ndi, wak rondᵾⱡnga kᵾn, wamp ei, Got kᵾn numan onunga etpa ngurum,” nitim. 48Wote Jisas ndi, amp ni, kundpa nimba mel, “Na ndi, nim nga uⱡ kit etᵾn mbᵾ pora, wak rondᵾnt,” nitim. 49Wu mat Jisas kᵾn, rat pol ila rᵾp rok morung nimbᵾ ndi, ik nitim ni pilik, en enim puⱡ mondᵾk, nᵾk int yant etᵾk nᵾk mel, “Wu ei namba wu ti nda? Amp ei nga uⱡ kit etᵾm mbᵾ, wak rondᵾnt ninim ei ka!” nᵾtᵾng. 50Wote Jisas ndi, amp ni, kundpa nimba mel, “Nim nga mondpa pili uⱡ ei ndi, akup nim etpa tᵾnᵾm. Nim numan wang ndukᵾn pi!” nitim.